الجواب الفصيح في الكون الفسيح: 25

السؤال الخامس و العشرون: لو الوقت بفلوس هيبقي بكام؟

طبعا لو وقتك كان ليه اي قيمة مادية او غير مادية مكنش زمانك بتقرا الكلام ده. بس خلينا نتجاوز الموضوع ده. من زمان و ناس كتير -اهلي و اصحابي في الشغل- عمالين يقولوا "يا ابني متضيعش وقتك" و "خلي وقتك بفلوس" و الكلام الي ملوش عازة ده لغاية من اربع ايام كنت عايز اكل و كان الاختيار بين نعمل اكل في البيت ب 20 جنيه/الفرد و هناخد ساعة تقريبا و لا نطلب اي fast food هيجي في 15-20 دقيقة بس هندفع 40 جنيه/فرد؟ و هنا تيجي بقي ال time-money dilemma هل وقتك مهم للدرجة انك تدفع فلوس اكتر و لا ﻷ؟ و لو اه هتدفع لغاية كام؟

بعيد عن موضوع الاكل (و بالمناسبة احنا عملنا اكل في البيت ساعتها) بس فيه مواقف كتير اهم من ده بتحتاج نحدد قيمة وقتنا من غير ما ناخد بالنا. تركب تاكسي وتوصل علي طول ولا تستنا الاتوبيس؟ تقف في الطابور تستني الدكتور و لا تحجز مستعجل؟ تاخدوا جهاز واحد في البلايستشن و تسنتي عقبال ما تلعب و لا تاخدوا جهازين؟ و غيرها كتير. فيه حاجات كتير بتخش في الحسبة دي، هات ورقة و قلم و تعالي. مبدأيا كده كلنا لينا extreme points يعني لو حد قالك تعالي اشتغل حاجة هتاخد ساعة و هيدك جنيه اكيد هترفض لكن لو هيديك 2000 جنيه اكيد هتوافق. عشان تعرف ال average point بتاعتك احسب عدد ساعات الشغل و الفلوس الي بتاخدها من الشغل، مثلا لو بتشتغل full-time كل يوم 8 ساعات و ساعة مواصلات يبقي في الشهر تقريبا 200 ساعة، لو بتقبض مثلا 4000 جنيه يبقي انت في الساعة تقريبا بتاخد 20 جنيه! قليل صح؟ ناس كتير لما بتحسب الحسبة دي بتخس انها مظلومة جدا، تخيل واحد freelancer بياخد 100 جنيه في الساعة، او consultant بياخد 500 في الساعة، بس هل الناس دي بتشتغل 200 ساعة في الشهر؟ في الغالب ﻷ! الموضوع بيتحسب علي كل الوقت الي بتقضيه سواء في الشغل او بتروح للشغل او بتفكر في الشغل مش بس الوقت الي بتقبض فيه. 

لما تحدد قيمة الساعة بتاعتك هتقدر تحدد حاجات كتير، مثلا لو بتاخد 50/ساعة يبقي احسنلك تركب تاكسي ب 40 جنيه هيوفرلك ساعة، بس لو بتاخد 20/ساعة يبقي ملهاش لازمة تقف في طابور 30 دقيقة عشان تاخد خصم 5 جنيه، و هكذا. بس الكلام دي بينفع بس لو الحاجة الي هتدفع فيها هتستفاد منها بقيمة مادية برضه، بس متقدرش تقول مش هخش سينما ب 100 جنيه لمدة ساعتين مثلا، عشان راحتك النفسية الي هتيجي لما تستمتع بالفيلم اهم بكتير من القيمة المادية للساعتين دول. عشان كده خلينا نحسب القيمة المادية للحاجة الي بتبسطك. يعني مثلا لو بتضيع 10 ساعات شغل كل يوم فانت محتاج 6 ساعات نوم عشان تقدر تشتغل، يبقي فاضلك  8 ساعات بس لباقي الحاجات في حياتك. يعني انت بتستهلك 16 ساعة شغل عشان 8 ساعات بس في اليوم! يعني قيمة ساعة واحدة بس من حياتك عشان تاكل او تشرب او تتفسخ او تقعد علي القهوة بقيمة ساعتين بتشتغل فيهم! و طبعا كلنا عارفين ان كل ما الحاجة بتقل قيمتها بتغلي، يعني لو عندك 50 سنة يبقي فاضلك متوسط كده 10 سنين كمان و تموت يعني ساعتك اغلي كمان من ال average الي حسبته. 

بالنسبة لي انا بشتغل on average 9 ساعات في اليوم بمعدل 23جنيه/ساعة و بنام علي الاقل 10 ساعات كمان، فانا ممكن ادفع كتير في حاجات تافهة بس تخليني مبسوط. الخلاصة وقتك قيمته المادية اقل من الي انت فاكره، و ده الجواب الفصيح!

الجواب الفصيح في الكون الفسيح 25: ليه الانسان بيغير/يتزغزغ/يركب الهوا؟

السؤال الخامس و العشرون: ليه الانسان بيغير/يتزغزغ/يركب الهوا؟

لو انت من الناس دي فربنا معاك عشان اكيد عندك اصحاب هبل بيبهدلوك كل شوية، لو انت بقي من الاصحاب الهبل، فربنا يسامحك يا شيخ. بس بعيدا عن  الناس دي، ليه في ناس بيحصلها كده؟ ولبه مش كلنا؟

في جزء في ال Psychology اسمه ال Gelotology، و ده الجزء الي بيدرس ليه الانسان بيضحك و ايه لازمة الضحك، و الموضوع مش بسيط زي ما انت متخيل (ابسلوتلي!)، ال gelotologists اكتشفوا انك لما بتسمع نكتة روشة او تشوف فيلم كوميدي، عقلك بيتعلم ازاي يميز ال logical order of events يعني لما تشوف واحد وقع علي وشه في الطين، و الموقف ده حصل في اطار كوميدي زي ان الممثلين بيهزروا مع بعض او ان فيه موسيقي خفيفة بتلاقي نفسك بتضحك، بس لو الراجل الي وقع في الطين ده كان بيجري من مجرم او خايف من حاجة مش هتضحك (غالبا، فيه ناس معندهاش اي sense ممكن تضحك علي اي حاجة)، و السبب ان العقل البشري pattern-attentive يعني بياخد باله من النمط بتاع الاحداث، فالبنسبة للموقف الكوميدي، مخك بيفهم ان مش ده المفروض يحصل و بالتالي بيضحك، لكن في الموقف التاني رغم انه مش شائع بس عادي لما حد يكون بيجري و هو خايف يقع علي وشه. فالبتالي لما بتضحك علي حاجة ده دليل ان مخك بيتعلم حاجات جديدة، عشان كده النكات بتضحك اول مرة بس.

نيجي بقي لل ticklishness، الانسان بيضحك لما بيغير/يتزغزغ علشان هو بيتعلم ازاي يدافع عن نفسه. الاماكن الي الانسان بييغير منها بتبقي sensitive و نقط ضعف في الجسم، و بالتالي الانسان بيضحك مش عشان هوا مبسوط بالي بيحصل (ابدا و الله) هوا بيحاكي شعوره لما بيضحك عشان متبقاش دي اماكن ضعف، تخيل مثلا لو الانسان كان بيبكي لما ده بيحصل او بيحس بالحزن الموضوع كان هيكون اسوا بكتير. الاطفال الصغيرين و الكبار من بعد سن 45 بيكونوا اكثر عرضة للموضوع ده، و ده عشان الصغيرين و العواجيز بيبقوا اضعف جسديا فهم محتاجين defense mechanism جديد الي هو الضحك.

بس ازاي الضخك بيساعد؟ زي ما اتكلمنا في الاول الانسان لما بيضحك بيتعلم ازاي يميز ال patterns of events، عشان كده لو واحد غضبان او متضايق و حاولت تزغزغه مش هيضحك، و كمان بيخليه يفرق لما يكون حد بيهزر معاه او يضربه، لو انت بتتخانق و حد بيضربك مثلا في بطنك مش هتضحك. كمان الضحك هيشجع الناس انها تزغزغك اكتر، و رغم انك مش هتحب ده، بس عقلك هيتعلم اكتر. و عشان كده لو حاولت تزغزغ نفسك مش هتضحك لانك عارف ان انت الي بتعمل كده، فبالتالي عقلك مش بيتعلم حاجة جديدة.

باختصار being ticklish ده معناه انك هتتعلم طرق افضل للدفاع، و بالتالي فرصتك في النجاة اكبر. و هو ده الجواب الفصيح!

الجواب الفصيح في الكون الفسيح: 24

السؤال الرابع و العشرون: ليه اسمه check box مش check square؟

ال check box هو واحد من اشهر ال GUI widgets الي ظهرت مع بداية ال graphical interfaces في الثمانينات كده. بس هو ليه box؟ المفروض يبقي اسمه square عشان هو 2D element. بعد تفكير عميق وصلت للاحتمالات دي:

1.  لو دورت هتلاقي ان ال check box كان موجود قبل الكمبيوتر و ال GUIs و كانت بتسخدم علي الورق زي الانتخابات كده مثلا، ممكن يكون هو box فعلا بس كان لازم يترسم مربع عشان لو اترسم مكعب هيكون باين 3 اوجه و بالتالي مش هتعرف تعمل tick فين.

2. بالنسبة للكمبيوتر فهو ممكن جدا يكون box بس احنا بنشوف 2D slice منه، و ال3rd dimension ده هو الكمبيوتر نفسه، و بالتالي لو عندك 3D screen and glasses ممكن تشوفو box فعلا.

3. مينفعش يبقي square لانه في الحالة دي لو عملنا عليه check او صح، هتبقي عليه مش جواه، و بالتالي ال element ده مش هيcontain اي معلومات او data.

خلال البحث العميق اكتشفت ان فيه مشاكل دايما بين ال square و ال box، مثلا المقولة بتاعة "think out of the box" كان اصله puzzle مشهور، اسمه "the nine dots puzzle" و ده عبارة عن 9 نقط و المفروض توصل بينهم بخط واحد من غير ما ترفع ايدك عن الورقة، الpuzzle ده موجود في الكتاب العظيم The encyclopedia of puzzles للعظيم Samuel Loyd سنة 1914، و الفكرة ان حل الpuzzle ده كان لازم الخط يحرج عن المريع، و بعد كده في السبعينات و الثمانينات الشركات بدأت تاخد ال puzzle ده كمثال لل creative thinking و كده، و من هنا اتشهرت المقولة. مين الي خلاه box محدش يعرف؟

الخلاصة ان احنا عندنا مشاكل في ال boxes و ال squares، و هو ده الجواب الفصيح!