الجواب الفصيح في الكون الفسيح :20

السؤال العشرون: ليه التليفزيونات مربعة او مستطيلة مش مدورة؟

السؤال ده عميق اه، بس مش بتاعي الصراحة، صديقي الطبيب -الي هيسيب الطب- سألني السؤال ده في محاولة للوصول لاجابة الكون. و طبعا بعد تمحيص و بحث و تفكير، اكتشفت ان الموضوع ده بيمس كل واحد فيكم، و حان وقت الاجابة.

مبدأيا خلينا نفرق بين التلفزيون و شاشة التلفزيون، زمان كانت التلفزيونات كبيرة و كان بيبقي ليها اطار خارجي، و عادة بيكون خشبي. و في فترات كان بيبقي معاه راديو أو مكتبة صغيرة، عشان يصبح شكله شبيه بالدولاب الصغير. حاليا التلفزيون بقي عبارة عن شاشة بس. نخش بقي علي الاجابة.

ال visual perception للانسان، او الحس البصري بيلعب دور مهم في الموضوع ده. عين الانسان فيها عدسة، و اي عدسة بيكون ليها حاجة اسمها focal length او بعد بؤري، و دي المسافة الي عندها النقطة بتتجمع فيها الاشعة الي العدسة بتجمعها. الانسان ممكن يشوف في مجال 180 درجة من غير ما يحرك عينه، بس فيه جزء معين بس هو الي بناخد بالنا من تفاصيله، و الجزء ده اسمه central visual field و ده بيكون شكله تقريبا مدور،و المنطقة دي بيكون فيه اعلي تركيز لل cones الي بيستقبلوا الالوان، و كل ما تبعد عن النطقة دي تركيزك بيقل جامد، فبالتالي لو انت بتبص علي حاجة مدورة هيكون تركيزك او ادراكك ليها اكبر، و عشان كده الحروف الصينية -ومن قبلها الهيروغليفية- كانت عبارة عن رموز مفردة و بتتكتب راسيا عشان تخليك شايف الحروف في الجزء بتاع الcentral visual field و بالتالي تعرف تقراها اسرع و اسهل.وبالفعل الشاشات في البداية كانت مدورة و لنفس السبب لازلت بعض الشاشات مدورة عشان تساعد علي الرؤية في استخدامات معينة، زي شاشة الرادار، عشان موجات الرادار بتبقي عبارة عن دواير فأحسن ان الشاشة تكون مدورة. ، بس ليه بقي خلينا الشاشات مربعة؟ 

السبب هو تطور التكنولوجيا عموما. زمان كانت الشاشات مبنية علي فكرة الcathode ray tubes و ديه بتبقي عبارة عن tube كبيرة بيحصل فيها عملية معينة بتخلي الالكترونات الي موجودة في جزء من الtube تتطلع photons بلون معين فتكون الصورة. و عشان كده الشاشات القديمة خالص كانت مدورة. بس كانوا بيعملوا الجسم بتاع التلفيزيون نفسه مربع عشان يبقي اسهل في النقل و التخزين و هكذا. بعد تطور التكنولوجيا، ظهرت فكرة ال raster scanning و ديه الفكرة الي شغالين بيها دلوقتي، و دي عبارة عن ان الprocessor الي موجود في الشاشة بيقسم الشاشة لصفوف و اعمدة عشان يعمل pixels و يبدأ يعرض الصور علي ال pixels دي حسب اللون. و بالتالي كان الافضل ان الشاشة تكون مربعة/مستطيلة عشان يعملوا mapping احسن. ده غير ان الشكل المربع/المستطيل بيكون موفر اكتر في التصنيع،  و بالتالي كانت الشاشات ال LCD و ال LED مربعة او مستطيلة. طيب ليه دلوقتي بيعملوا الشاشات curved؟

الفكرة في الشاشات الcurved انها تزود احساسك بالبعد التالت للصورة، او الdepth enhancement، عشان الشاشة مش مسطحة، فبالتالي فيه اجزاء من الشاشة بتكون اقرب ليك و انت قاعد بتتفرج، و ممكن نلعب في الصور بطريقة تخليك تحس ان دي 3D image عشان فيها depth.

دلوقتي تقدر تتفرج علي التليفزيون و انت مبسوط و مرتاح! و هو ده الجواب الفصيح! 

الجواب الفصيح في الكون الفسيح : 19

السؤال التاسع عشر: البيضة ولا الفرخة ؟

سؤال عميق يعني مش اي كلام، السؤال ده قديم جدا، بدأته فلاسفة قديمة جدا زي Aristotle و Plato، و في الحقيقة هم مكنش عندهم مشكلة شخصية مع الفراخ، هما كانوا بيدورا علي اجابة للكون نفسه، إزاي الكون بدأ؟ من الي بيجي الاول اليل ولا النهار؟ اول بني ادم كان راجل و لا ست؟ و حاجات زي كده كتير، و عشان كده حطوا مبدأ مهم جدا اسمه Defining by opposition، يعني انك تعرف الحاجة بعكسها، زي ان الظلام هو عدم وجود النور و هكذا، و أغلب الفلاسفة توصلوا ان الpairs دي نشات مع بعضها، عن طريق قوة اكبر منهم، و ان كل المخلوقات قبل ما توجد ماديا، كانت وجودة روحيا! خلاص كده اتحلت المشكلة؟ ابسلوتلي يا افندم!

بعض المرحلة الفلسفية البحتة دي، ظهر العلم الحديث -الحمد لله- و بدأ العلماء يفكروا في المشكلة دي من ناحية تانية خالص، و كان هدفهم في دراسة الموضوع ده انهم يشوفوا اذا كان حاجة زي "البيضة ولا الفرخة" بتثبت و لا بتنفي نظرية التطور. و من هنا بدأ الجد. في البداية العلماء اكتشفوا بروتين اسمه OV-17 و ده مسئول عن تكون البيض، و ده موجود بس في المبيض عن الفراخ، يعني كده لازم الفرخة تكون موجودة عشان يجي البيض!

 بس فيه هنا بقي مشكلة، هي "بيضة الفرخة" هي البيضة الي بتبيضها فرخة ولا الي بتطلع فرخة؟ يعني لو افترضنا ان فيه فرخة باضت بيضة بعد كده البيضة دي طلعت عصفور مش فرخة، تبقي ديه بيضة فرخة ولا بيضة عصفور؟! ال Genetic Mutations الي بتحصل في مرحلة ال reproduction ممكن تأدي الي اختلافات في الابناء عن الاباء، و ده الي خلي فيه اختلاف في انواع الحيوانات، وبالتالي ممكن نقول ان فيه حيوان يشبه الفرحة، بس مش فرخة، ونسميه مثلا "x"، وفي يوم "x" تزوج "x" و حصل mutation في البيضة، ادي الي ان البيضة تطلع فرخة. و بالتالي البيضة هي الي جت الاول. بالرغم ان التفسير ده منطقي جدا، بس فيه مشكلة صغيرة، و هي ان ال genetic mutation مش بتادي الي تغير لحظي، لازم تحتاج اجيال كتير جدا و يظهر فيه الصفات المختلفة، زي الكلاب و الذئاب كده.

يبقي كده مفيش غير حل من اتنين، يا اما الكائن ال"x" تزاوج و طلع بيضة من النوع "x" بس حصل فيها mutation فطلعت فرخة و بعد كده الفرخة طلعت بيضة الفرخة، يا أما الكائن ال"x" فضل يتطور علي مدة كبيرة لغاية ما قدر يبيض بيضة فرخة لوحده. 

يعني من الاخر البيضة جت الاول، السؤال هنا هي بيضة فرخة و لا بيضة "x"! وهو ده الجواب الفصيح!

الجواب الفصيح في الكون الفسيح :18

السؤال الثامن عشر: هل أنت فعلا حر ولا لأ؟

من اول يوم بدأت فيه السلسلة دي، و أنا مستني اليوم الي هكتب فيه السؤال ده، طبعا انا مش بتكلم علي الحرية السياسية و لا الاجتماعية، عشان دي سهلة جدا في انك تحكم عليها، انا بتكلم علي حرية اعمق بكتير، هل انت حر في قراراتك و افكارك و لا لأ؟ بغض النظر عن انتماءك الديني، بس مينفعش تقول ان الدين بيقول كده لازم يكون فيه دليل مقنع، و هنا -سيداتي و سادتي- تأتي الفلسفة.

مشكلة الارادة الحرة أو ال Free Will من اقدم المشاكل في الفسلفة و فيه فلاسفة كتير اتخانقوا علي الموضوع ده. 

المشكلة هنا بين فريقين، لو انت قاعد في المقصورة الرئيسية، هتلاقي علي اليمين فريق ال Libertarians و دول شايفين ان الانسان حر في قراراته و اختياراته و ان عنده ارادة خاصة، و علي ايدك الشمال هتلاقي فريق ال Determinism و دول بيقولوا ان كل شئ بيحصل هو نتيجة لاحداث حصلت قبل كده، حتي اختياراتك و قراراتك الجميلة. يبدأ الماتش من عند فريق ال determinism، يطلع فيلسوف فرنسي اسمه Baron D'holbak يقولك اي حاجة في الكون مرتبطة فيزيائيا ببعضها و اي حاجة بتحصل هيا نتيجة لحاجة حصلت قبلها، مثلا لو لقيت كرة بتطير في الهواء، يبقي لازم يكون في حاجة او حد ضربها، و ان سلسلة الاحداث دي مستحيل تتكسر، حتي لو جيت قلت انك مش هتعمل فعل معين عشان تكسر السلسلة دي و بالتالي تثبت عدم وجودها، فعدم فعلك للفعل ده كان نتيجة لوجود السلسلة نفسها. يروح بقي فيلسوف من فريق ال Libertarianism، يرد و يقول ان احنا ممكن ببساطة نثبت ان الفعل ده حر و لا لأ عن طريق حاجة بسيطة جدا، و سماها The principle of alternate possibilities، و المبدأ بيقول ببساطة ان لو عندك اختيارات مختلفة كان ممكن تختار منها، يبقي اختيارك ده حر. يعني لو انت واقف علي عربية فول و معاك فلوس كفاية، فانت كان ممكن تطلب فول بالزيت الحار، او بالزيت الحلو، او بالبيض، و اي كان اختيارك فهو اختيار حر. تمام لحد هنا؟

يجي بين الشوطين و يقعد الفريقين مع بعض و يتفقوا علي مبدأ مهم جدا اسمه ال Hard determinism و ده بيقول ان الحاجات الي بره حكم الانسان لازم تكون نتيجة لحدث سابق ليها، يعني مينفعش الاقي العربية بتمشي لوحدها، لازم انا الي اسوق العربية دي. و ان الفيزياء هي الي بتفسر العلاقة دي. تخلص الاستراحة و نرجع للماتش، ويروح فريق ال libertarianism يكمل و يقول، ان فيه فرق بين ال Event Causation و ده ان اي حاجة physical لازم زي ما قولنا قبل كده تكون نتيجة لسبب قبلها، و ال Agent causation و ده ان الانسان ممكن هو نفسه يبدأ سلسلة جديدة من الاحداث لمجرد انه عايز كده، يعني لو لقيت كره طايرة في الهواء فده معناه ان لازم يكون فيه حد ضربها (و ديه ال event causation ) بس الراجل الي ضاربها ممكن يكون عمل كده لأنه عايز يضرب الكورة مش اكتر، و يبدأ سلسلة جديدة من الاحداث (وهو ده مبدا ال agent causation) او ببساطة مبدأ"كيفي كده"!

يسكت فريق ال determinism، لا ابدا ميصحش، يروح يطلع فيلسوف يقولك، بس اصلا قرارت الانسان دي و اختياراته نتيجة عن حبة عوامل زي الرغبة أو المزاج، لو انت واقف علي عربية الفول، فانت اخترت الفول بالزيت العادي، لأن البيض بيجبلك انتفاخ، و الزيت الحار هيخليك عطشان مثلا، و الرغبة دي او مزاجك ده هو ناتج من مخك و الي هو عبارة عن biological state و الحالة دي عبارة عن اشارات مخية و بالتالي هي physical state و بالتالي هي نتيجة لاسباب حصلت قبلها، طبقا لمبدا ال Hard Determinism، البيض جبلك انتفاخ قبل كده فعشان كده انت مش عايز تاكله، و الجو حر فمش ناقصة عطش فبلاش الزيت الحار، و بالتالي الزيت الحلو هو الاختيار الامثل. و الفريق ده شايف ان كل ما العوامل النفسية بتتغير -طبعا نتيجة عوامل سابقة- بيتغير الاختيار، فانت بتبقي شايف نفسك حر بس للاسف ده مش صحيح.

من الاخر انت بتاكل فول عشان احنا معناش فلوس! و هو ده الجواب الفصيح!

الجواب الفصيح في الكون الفسيح :17

السؤال السابع عشر: هل العفاريت و الاشباح موجودة فعلا ولا لأ؟

 طيب مبدأيا كده انا مش بتكلم علي جو الاعمال و نجيب رجل فرخة و نسلقها و بتاع، انا بتكلم علي الفكرة نفسها، هل ال spiritual beings ديه موجودة ولا لأ، بغض النظر عن طريقة التواصل معاهم، فممكن تولع حبة بخور و تيجي تكمل قراءة.

من فترة كده كنت لعبت لعبة اسمها P.T مع ناس صحابي و اللعبة عبارة عن مقدمة ل horror game و اللعبة كانت معمولة بحبكة و شكل يخليك تندمج معاها جدا، اول مرة لعبت اللعبة (و طبعا كنا قافلين النور و كده) اتخضيت و النبض زاد و كده، بس برضه مكنش شعور بالخوف الشديد، لأني عارف انها في الاول و في الاخر لعبة و بمجرد ما خلصنا لعب نسيت الموضوع كله. ساعتها كنت بتسائل ليه ممكن نتخض من لعبة او نخاف منها؟ امبارح بقي كنت (مع نفس الصحاب) في جلسه لاستحضار الشياطين و كانت الظروف مناسبة للغاية (مكان غريب و فاضي و ضلمه) الي حصل ان احنا اتفقنا نشغل ما يسمي "دعاء للشياطين" علي حسب كلام الشخص الي كان شغلوا، و فضل يحكيلنا عن كمية خطورة الموضوع ده، ساعتها انا كنت خايف فعلا، و فيه ناس كانت بتجهز قران علي الموبايل عشان لو حصل حاجة تشغله، و الناس كلها مستعدة حرفيا لأنها تستقبل الشياطين، بس برضه شعور المغامرة كان اقوي بكتير و أنا شخصيا لا أؤمن بالكائنات دي ( بس بخاف منهم!) فشغلنا "دعاء الشياطين" و هوبا دبل كيك، محصلش اي حاجة علي الاطلاق! و حسيت بالسذاجة اني كنت خايف في الاول.

تفسيري الشخصي لموضوع العفاريت و الجن و كده، ان الموضوع كله لعبة نفسية مش اكتر، الشخص الي بيحاول يخوفك من الموضوع ده بستغل مواقف او حكايات معينة، وطبعا الظروف  المحيطة بك عشان يبدا يضحك علي دماغك، و ده نفس الي صاحبي عملوا امبارح. اللعبة النفسية دي بتخليك مستعد تصدق باي حاجة، لو حتي دبانة عدت من قدامك هتفتكرها شيطان طائر! المشكلة ان دماغك subconsciously بتحتفظ بالكلام ده و تبدأ في مواقف معينة ت recall الحاجات دي، زي مثلا قبل ما تنام علي طول دماغك بيبقي مستريح و ممكن بقي تشوف illusions قبل ما تنام علي طول و طبعا بتلقائية شديدة هتقول انها عفاريت. فيه عالم اسمه Michael Persinger ده عالم و باحث في مجال ال cognitive neuroscience، عمل تجربة مشهورة جدا اسمها "The God Helmet" و دي عبارة عن خوذة عادية بس متوصل بيها electric probes بيتحكم فيها عن طريق كمبيوتر بحيث انه يقدر يبعت اشارات كهربية تحفز اجزاء من المخ، و العالم ده كان بيقول للناس انه يقدر يخليهم يشوفوا العفاريت او حتي الاله عن طريق الخوذة دي. و فعلا 99% من الناس قالوا انهم شافوا illusions و حسوا كأن فيه كائنات معاهم في الاوضة، او سمعوا حاجات. و الموضوع منطقي جدا، لو انت عندك Sensor مثلا الي بيفتح الابواب في المولات و كده، لو فيه مشكلة حصلت لل sensor هتخليه يفتح الباب ويكأن في حاجة بس هي مش موجودة، و كذلك دماغك ممكن في ظروف معينة تبعت false signals تخليك تحس بوجود حاجة مش موجودة اصلا، بس دماغك بتبعلك الاشارة ويكأنها موجودة، وهي دي اللعبة كلها. الراجل Michael Persinger ده عنده محاضرة بعنوان "No More Secrets" لازم تشوفها.

طبعا فيه تفسيرات تاني للموضوع ده واشهرها:

1. ان العفاريت دي هي ارواح الناس الي ماتت، باعتبار ان الطاقة لا تفني فالناس لما بتموت الطاقة بتعتها هي الي بتكون العفاريت.

2. ان العفاريت دي عبارة عن كائنات عادية بس في بعد اخر، و ده حوار القرين و كده.

3. ان العفاريت و الحاجات دي عبارة عن نوع من الطاقة ال بترتبط بالاماكن في حوادث معينة، زي ان حد يتقتل في بيت و الكلام ده، و ده معتمد علي فكرة ان كل واحد ليه thermal signature بتاثر في الاماكن الي بيروح فيها.

من الاخر "ما عفريت الا بني ادم" - مثل شعبي قديم-، و هو ده الجواب الفصيح!

الجواب الفصيح في الكون الفسيح : 16

السؤال السادس عشر: أنهي الافضل الاغاني الشعبي ولا الأوبرا؟

"و اتكعبلت في توكتوك" في الخمس سنين الي فاتت انفجرت ماسورة الاغاني الشعبي، كل الناس بتغني شعبي و مهرجانات و بتاع و شغل زي الفل، و ناس كتير بتقولك "إيه الاسفاف ده!" "ياي  Oh my god انا مش قادر اسمع" و طبعا الحج و الحاجة الي بيفضلوا يقولوا "فين ايام الفن الجميل ..مسم".

و هنا بقي السؤال هل الاغاني الشعبي وحشة فعلا؟ طيب تعالوا نشوف الموضوع ده من الاول. علشان تقدر تحكم علي حاجة انها صح او غلط، بتحكم عليها سواء فلسفيا، اقتصاديا، دينيا، اجتماعيا او هكذا. لو بصيت علي الاغاني الشعبي هتلاقي انها زيها زي اي اغنية (كلمات + موسيقي = أغنية) نوع الموسيقي او الكلمات ده بيبقي ذوق مفيهوش صح و لا غلط، و الي الي بيعجب الناس هوا الي بيبقي ليه شعبية اكتر و هوا الي بيبقي الصح!

و ده بيرجع لمذهب في الفلسفة اسمه ال Utilitarianism او مبدا المنفعة و ده مبدأ كان اسسه فيلسوف انجليزي اسمه Jeremey Bentham وجه بعد كده فيلسوف انجليزي تاني طوره و نضفوا كده اسمه John Stuart Mill. المبدأ ده بقي بيقول ان الانسان في تصرفاته و قرراته بيميل لأنه يزود السعادة و المتعة و يبعد عن الالم و الشقاء و الحاجات الوحشة، و كل ما فعل معين يزود عنده المتعة و السعادة يبقي فعل مفضل و محبب، طالما مش بيتعارض مع واحدة من المبادئ بتاعته (خد بالك من الموضوع ده)، و علي الاساس ده كان الراجل Stuart Mill ده بيقول ان القوانين و القواعد مفروض يكون هدفها انها تحقق المنفعة الاكبر لكبر عدد من الناس و بالتالي الغالبية العظمي دي تبقي سعيدة و مبسوطة. و ان الفعل الي بيحقق الهدف ده (المنفعة الاكبر) هو الفعل الاخلاقي العادل الي المفروض الدولة تنفذه. طبعا ناس كتير و فلاسفة اكتر بدأت ترفض الفكرة لاكتر من سبب، اهمها ان ممكن الفعل الي بيحقق السعادة ده يبوظ حاجة تانية او بيتعارض مع مبادئ تانية. يعني مثلا السرقة فعلا خاطئ و جريمة و مينفعش نعملها اطلاقا، طيب ايه رايك في "روبن هوود" نسرق من الاغنياء القليلين و ندي للفقراء الي هما كتيير جدا و نحقق المنفعة الاكبر، هتختار ايه؟! طيب و لو نفترض ان الفقراء دول هم اهل دولتك او اهل قريتك، و الاغنياء دول دولة تانية؟! طيب لو الفقراء دول اهلك انت و الاغنياء دول عيلة تانية في نفس المدينة/الدولة هتعمل ايه؟

نرجع بقي للاغاني الشعبي، طبقا لمبدأ المنفعية فالحاجة الي اكبر عدد من الناس بيحبها يبقي هيا الحاجة الاحسن، هي الصح. الاغاني الشعبي و الافلام الي علي نفس الطريقة، بتعجب الناس و بتجيب فلوس فبالتالي الناس بتستثمر فيها اكتر فالمفروض هيا الي تكتر. طبعا مع احترامي لذوقك الشخصي فانك تسمع اوبرا او شعبي.

من الاخر تسمع ام كلثوم أو عبد الباسط حموده، مش فارقة المهم تكون مبسوط! و هو ده الجواب الفصيح!

الجواب الفصيح في الكون الفسيح : 15

السؤال الخامس عشر: ليه بيجلنا كوابيس؟

من كام يوم حلمت ان فيه قرد دخل الشقة بتاعتي و بيضربني و كان بيتكلم و صوته زي صوت مدرس عربي كان بيدرسلي في اعدادي، و الموضوع كان فعلا مخيف، انت متعرفش المدرس ده كان عامل ازاي! فيجي السؤال بقي احنا ليه بيجلنا كوابيس؟ من زمان جدا و الناس كلها في حيرة من الموضوع ده  و حتي النهاردة في ناس كتير و ثقافات كتير لسه مؤمنة بالخرف و الخزعبلات بتاعة زمان. الكلمة نفسها Nightmare نشات تقريبا في القرن ال 18 و كانت الناس بتقول ان الكوابيس هي عبارة عن ان mare (و ده كلمة كانوا بيطلقوها علي نوع من الشياطين و ممكن يكون incubus و ده شيطان ذكر بيغتصب البنات و هما نايمين، أوSuccubus و دي الشيطانة الانثي الي بتغتصب الرجال) و ان الشيطان ده بيقعد علي صدر الناس و هيا نايمة فيجبلوهم كوابيس.

 حتي الان مفيش سبب محدد لحدوث الكوابيس -ولا حتي الاحلام- بس القول الغالب انها بتحصل نتيجة زيادة في نشاط المخ في مرحلة ال Rapid Eye movement sleep أو ال REM Sleep. و برده مفيش حاجة محددة لسبب زيادة نشاط المخ، بس الدراسات اكتشفت correlations ما بين الكوابيس و حاجات كتير زي مثلا:

1. انك تاكل متاخر باليل قبل ما تنام، ممكن يزود فرصة ان يجيلك كابوس (تقريبا لا تنطبق علي المصريين)

2. الخوف أو القلق من حاجة معينة سواء موقف معين او عندك امتحان او خايف من ابوك، ده ممكن يزود احتمالية ان يجليك كوابيس

3. بعض العلماء اكتشفوا ان نسبة كبيرة من الناس الي بيعانوا من الكوابيس السخيفة و متكررة أن عندهم brain disorder معين ناتج عن genetic mutation. 

4. ناس كتير من الي بيحصلهم حوادث مخيفة، او اي تجربة تانية زي الحروب و الكوارث الطبيعية بيحصلعم كوابيس بشكل كبير، زي ما حصل في Laos بعد الحرب في فيتنام، كان الناس كلها تقريبا بيجلها كوابيس و كان فيه ناس بتموت و هيا نايمة (بس ده بعد كده اكتشفوا انه نتيجة مرض نادر في القلب) و الناس هناك بدأت تعمل شعائر معينة عشان يطردوا الشياطين و ميجلهومش كوابيس.

5. الاطفال الصغيرين و خاصة البنات، بيبقي عندهم خوف كبير من التعامل مع العالم الخارجي و ده الي بيزود نسبة الكوابيس عند الاطفال.

6. بعض الناس الي عندهم imaginative minds بيجلهم كوابيس كتير، بس في الغالب بتساعدهم مش بتضايقهم، زي نيوتن و بتهوفن و تسلا.

في رايي ان كل الاسباب دي  مش هي العامل الاصلي في الكوابيس، و ان احنا محتاجين نعرف اكتر عن ازاي المخ بيشتغل عشان نقدر نحكم علي الموضوع ده. 

يعني من الاخر خلي بالك من مدرسين العربي عشان ممكن يطلعولك باليل. و هو ده الجواب الفصيح!

الجواب الفصيح في الكون الفسيح :14

السؤال الرابع عشر: ليه بنقول "مسافة السكة" مش "وقت السكة"؟

متسالنيش انا ليه فكرت في السؤال ده، بس ديه فعلا مشكلة، ليه في measurement units بتوصف حاجة غير معناها؟ أشهر مثال علي الموضوع ده هو ال light year رغم انها "سنة" ضوئية لكن هيا وحدة قياس مسافة مش زمن. بالظبط زي لما حد يسالك "قدامك قد ايه و تيجي؟" تروح قايله "مسافة السكة" انت تقصد الوقت الي هتاخده السكة. طب ليه بنعمل كده؟ اولا عشان فيه حجات Indeterminate أو indefinite متعرفش تقيسها، زي الوقت الي هتاخده في السكة كده،عشان بيتغير مع تغير الظروف. ثانيا: لو الرقم هيطلع Ir-readable زي مثلا لو قلتلك المسافة بتساوي 9.461e+15 متر، هتبقي اسهل لو قلتلك 1 light year. فيها حاجات كتير زي كده مثلا "فركة كعب" و دي وحدة لقياس الزمن، و لما حسبتها لقيتها تقريبا 0.8 ثانية!

و دي حبة units غريبة:

1. في استراليا بيحسبوا كمية المطر بال drops، ال drop الواحدة عبارة عن 1/4 ml.

2. ال shake و ديه وحدة لقياس الزمن (مستوحاة من ال milkshake) و ديه عبارة 10/1000000 من الثانية.

3. ال (لا مؤاخذة) butt، و ديه وحدة بيقسوا بيها كمية ال wine و بتساوي حوالي 476 لتر!

4. ال mickey (نسبة الي ميكي ماوس) و ديه وحدة بيقيسوا بيها اصغر حركة للmouse بتاع الكمبيوتر و علي اساسه بيحددوا ال sensitivity بتاعته.

5. ال Beard-Second و رغم ان فيها second بس دي وحدة طول، و بتساوي مقدار نمو الشعرة في ثانية واحدة.

و فيه حاجات كتير زي كده، يعني من الاخر مفيش استقرار ساعتك! و هو ده الجواب الفصيح!

الجواب الفصيح في الكون الفسيح :13

السؤال الثالث عشر: ليه البطاريات اسمها A-AA-AAA مش  A B C D ؟

طبعا ده موضوع في غاية الاهمية، و ممكن تكون مؤامرة، بس لأ اطمن انا -بعون الله- هحل الموضوع ده. عشان اجاوب علي السؤال ده دورت شوية كده لقيت موضوع علي Wikipedia علي ال Battery Nomenclature او تسمية البطاريات. في البداية كانت كل شركة بتنتج حاجة بمزاجها و تسميها برضوا اسماء علي مزاجها، لغاية ما حصلت مشكلة، في بداية القرن الي فات (حوالي 1907 كده) كانت اغلب البطاريات الي دلوقتي اسمها AA بتطلع 1.5 volt بس فيه شركة كانت بتنتج نفس البطارية بنفس الحجم بس بتطلع 1.25 volt بس!

 طبعا فيه حاجات باظت و كده، راحوا الناس قالوا لازم يكون فيه standardization. بدأت منظمة International Electrotechnical Commission او IEC،و ال American National Standards Institue أو ANSI في انهم يعملوا التسمية للبطاريات، في البداية كانوا بيقسموا البطاريات حسب المادة المكونة ليها و الvoltage بتاعتها، بس طبعا الناس في الشارع مش هتعرف الاسماء ديه، وبيختاروا بالشكل، و عشان كده عملوا common indexing و سموا الحاجات From A to Z، و طبعا عشان فيه احجام مختلفة لنفس النوع عملوا موضوع ال AA , AAA و كده، و علي فكرة طريقة التسمية دي موجودة في كذا حاجة زي إبر الخياطة (لو حد بيحب الخياطة هيلاقي ان فيه ابرة اسمها 0 و 00 و هكذا). 

طيب راحت فين باقي الحروف؟ ال standards ديه قديمة جدا و بالتالي فيه اكتر من شركة كانت بتنتج بطاريات و بعد كده قفلت، و الحاجات الي الناس بتسخدمها اكتر بدأت تنتشر اكتر و هكذا، عشان كده بدأت تختفي البطاريات الB.

يعني اتطمن مفيش مؤامؤة علي ماسر! و هو ده الجواب الفصيح!

الجواب الفصيح في الكون الفسيح: 12

السؤال الثاني عشر: ليه ما مشوفناش فضائيين حتي الان؟

طبعا قبل ما نقول اي حاجة انا مقصدش الفضائيين الي بنشوفهم في ماسر،  انا قصدي الفضائيين الي بجد! الموضوع ده كان شاغل تفكير العلماء كلهم تقريبا من زمان جدا، لدرجة ان فيه archaeologists بيترجموا بعض الرسومات من الحضارات القديمة علي انها طريقة للتواصل مع الفضائيين. حتي الان مفيش دليل يثبت أو ينفي وجود الفضائيين، بس خلينا ناخد الموضوع من الاول.

في الفترة ما بين 1940 و 1960 كان فيه عالم اسمه Frank Drake و ده كان astrophysicist كان بيحاول يحسب رياضيا ايه احتمالية وجود فضائيين، مش لازم بالشكل الي بيجي في الافلام بس تكون civilized race و طلع بمعادلة اسمها Drake Equation بتقولك كده من الاخر ان الكون ده مفروض يبقي مليان فضائيين و كل شوية نلاقي سفينة فضاء نازلة في موقف عبود، و عشان كده الناس بدأت تسأل، طب هما فين الفضائيين؟  الناس فضلت تفكر و تفكر لغاية ما وصلوا ان الموضوع ده paradox ملهوش حل او اجابة، و سموها Fermi's Paradox علي اسم الراجل Enrico Fermi ده فيزيائي ايطالي! 

طيب واحدة واحدة كده، مبدأيا كده احنا بنتكلم علي نطاق ال galaxy بتاعتنا بس، علشان الكون بيتمدد و بالتالي ال galaxies التانية بتبعد عنا بسرعة كبيرة -و متوقع توصل لسرعة الضوء- و حتي لو عرفنا نصمم سفينة سريعة جدا هنحتاج مليارات السنين عشان نوصل اصلا. في بقي حبة تفسيرات لموضوع ال paradox دي.

أولا: ال filters، بعض العلماء بيقول ان فيه حاجات بتحصل للكواكب زي الIce Age مثلا او براكين كتير او انفجارات، بتخلي الحياة تنقرض من عليه او ان الكوكب كله يتدمر، و احتمال يكون كوكب الارض عدي من الfilters ديه فالحياة لسه بسيطة و كذلك باقي الكواكب فمش عارفين نوصل لبعض، او ان احنا لسه هنعدي علي الfilters دي.

ثانيا: ممكن نكون احنا بدائيين جدا و بالتالي مش عارفين نتواصل مع حدمن الفضائيين، ولا هما واخدين بالهم ان احنا موجودين اصلا.

ثالثا: no one is transmitting، بالنسبة لينا احنا قليل جدا لما بنبعت رسائل في الفضاء لأن احنا مش عارفين نبعت ايه ولا ازاي و لا لمين، و بنفضل مستنين ان احنا نستقبل حاجة، و بالتالي ممكن تكون باقي الفضائيين عندهم نفس النظام، everyone is listening but no one is transmitting. 

رابعا: it's just the beginning، الفترة الي قضاها البشر علي الكوكب صغيرة جدا جدا جدا، و بالتالي ممكن يكون الكون برغم عمره الكبير، لسه في البداية اصلا و ان الكوكب بتاعنا من اوائل الكواكب، او ممكن يكون اول كوكب علي الاطلاق، و لسه باقي الكواكب بتتطورز

من الاخر احنا وحيدين في الكون، حتي الان، ولم يثبت عكس ذلك! و هو ده الجواب الفصيح!

الجواب الفصيح في الكون الفسيح : 11

السؤال الحادي عشر: ما هو السر وراء "Ana aslan wad mo4kela" و "قطرات الندي"؟

في الكام سنة الي فاتت الfacebook كلوا اتملي accounts زي دي ما حدش يعرف ايه لازمتها، وكنت بتسائل ليه فيه حد عاقل يعمل اكونت يسميه "ana aslan wad mo4kela" مثلا. و عشان نجاوب علي السؤال ده خلينا نعرف ايه الي بيحصل علي ال facebook. لو أنت عندك page لشركة او منتج او اي حاجة، و محتاج الناس تعرفك بتحاول تزود عدد ال likes عشان الناس تتابعك و كده تمام؟. دلوقتي فيه طريقتين عشان تزود ال likes بتاعتك، الطريقة الغير شرعية هي انك تشتري likes، فيه مواقع كتير زيBoostLikes  بتشتري من عندهم  likes، المواقع ديه بتستخدم حاجة اسمها ClickFarms و ديه موجودة في الدولة النامية زي الهند و بنجلاديش و طبعا مصر. بيشغلوا ناس يخدوا فلوس مقابل انهم يفضلوا يدوسوا like، الطريقة الشرعية بقي هيا ال Facebook Ads تعمل اعلان للpage بتاعتك و كل ما الناس تدوس علي الlink ويعملوا like انت تتبسط و facebook تاخد فلوس. جميل كده الكلام؟

 جه بقي واحد اسمه Rory Cellan-Jones بيشتغل في ال BBC، الراجل ده عمل page اسمها virtual Bagel مبتعملش اي حاجة غير انها بتبعتلك صورة ل bagel (كعكة شبه الdoughnut) وتنزل الصورة و تستمتع! طبعا حاجة ملهاش اي لازمة و مفيش حد ممكن يعملها لايك. الراجل ده عمله Ad و اختار ان الاعلان ده يظهر للناس من أمريكا و كندا و انجلترا و استراليا، و راح مختار حبة دول نامية زي مصر و اندونسيا ، و هوبا دبل كيك راح جاله 4000 like. الراجل استغرب ازاي حد ممكن يحب الهري ده، لما بص علي الناس الي عملتله لايك لقي ان الاغلبية العظمي من الدول النامية ديه و معظمهم ليهم accounts غريبة  و ذكر مثال لواحد من القاهرة اسمه "Ahmed Ronaldo" و البروفايل بتاعه كله صور لورنالدو بس.

طيب ايه المشكلة؟ هقولك انا، لما بتعمل post الfacebook بيعرضه لحبة من الناس الي تعرفهم و لو الناس ديه اتفاعلت مع الpost و عملت لايك و كومنت بيعرضه لناس اكتر و هكذا، لكن لما بتعمل Ad او boosting ال facebook بيعرضه لعدد اقل من الناس و الباقي بيبقوا ناس غريبة ملهاش لازمة، و بالتالي بتلاقي عدد ال likes بيزيد بس مفيش تفاعل لأن اغلب الlikes ديه fake مش ناس بجد. و السبب ان الكلام ده بيحصل، ان الناس الي شغالة في clickfarms لو بتعمل لايك للحجات الي هتاخد عليها فلوس بس(الي اصحابها دفعوا عشان ياخدوا لايكات) هيبانوا و الfacebook هيلغي الaccounts بتاعتهم، فيروحوا يعملوا like لكل حاجة موجودة، اي اعلان و اي page واي حاجة من اي دولة عشان يبقي صعب يبانوا. وعشان كده بتلاقي الaccounts الغريية دي زي "Ahmed Ronaldo" عاملين like لحاجات غريبة و عكس بعضها زي ناس عاملة لايك لصفحة الشيخ العريفي و في نفس الوقت لصافيناز!

يعني من الاخر ال facebook بيسرقنا و احنا مبسوطين! وهو ده الجواب الفصيح!

الجواب الفصيح في الكون الفسيح : 10

السؤال العاشر: ليه الثلاجة فيها لمبة و الفريزر لأ؟

ليه ها؟ السؤال ده محير جدا و لما دورت علي الموضوع ده طلعت مشكلة global، و حتي فيه شركات منتجة للتلاجات، بدأت تفتي و تخترع اسباب، و من فترة بدأت شركات تعمل تلاجات فيها نور في الفريزر، بس طبعا كشخص عميق، حاجة زي كده متعديش عليا. دول -في اعتقادي-أهم الاسباب: 

1. لما بتصحي من النوم بليل بتروح تفتح التلاجة مش الفريزر فمش محتاج نور هناك.

2. ممكن لو ركبت نور في الفريزر التلج يتكون عليه و يغطيه و بالتالي ملهوش لازمة.

3. عادة لما بنخزن حاجة في الفريزر بتقعد فترة، و كمان حجمه مش كبير فمش بياخد حاجات كتير. بالتالي الحجات الي فيه مش بتتغير بسرعة، فمش محتاج تفتح تشوف كل شوية فمش محتاج نور علي طول.

4. ال electronics ليها low temperature limit و لو الشركة عايزة تستخدم حاجة رخيصة ممكن 

مستحملش البرودة و تبوظ.

5. ممكن اللمبة الي في الثلاجة تساعدك تعرف التلاجة شغالة ولا لأ، عشان التلاجة مبتبقاش ساقعة جدا، بس الفريزر سهل تعرف هو شغال ولا لأ من غير نور.

6. في ناس بتقول ان النور في التلاجة بس عشان ال fresh food بيبقي شكله احلي في الاضاءة، بس دول ملناش دعوة بيهم عشان احنا الفول مبيفرقش معاه نور و لا لأ.

7. بعض الشركات عملت الفريزر بادراج عشان تخليك و انت بتفتح الدرج تتطلعه لبره فتشوف علي اضاءة الاوضة، خطة في منتهي الذكاء.

ممكن كل الاسباب ديه تطلع غلط و تبقي مؤامرة صهيوأمريكية، بس قشطة انا بحب كده! و هو ده الجواب الفصيح!

الجواب الفصيح في الكون الفسيح : 9

السؤال التاسع: من الاسرع ال Classic computers ولا Quantum computers ؟

قبل ما نجاوب علي السؤال، هنشرح الاول ايه الفرق بين الاتنين. ال Classic computers زي الابتوب، او الموبايل الي معاك، ال processors فيها مبنية علي ال transistors، ال transistor ببساطة عبارة عن switch زي مفتاح النور كده، بس علي عكس مفتاح النور مش محتاج حد يضغط عليه عشان يشتغل، هوا بياخد electric signal اشارة كهربية بدل من الحركة الميكانيكية، و لما ال transistor او المفتاح ده يبقي مش شغال (open) بنسمي الحالة دي state 0 و لما يكون شغال (closed) بنسمي الحالة دي 1 state. كل transistor اسمه bit. و هنا بقي يجل الشغل التقيل، اي data داخلة الكمبيوتر بتتحول ل 0 أو 1، و بالتالي بيجي دور العلماء انهم ازاي يقدروا يحولوا اي عملية حسابية او منطقية لطريقة يقدر الكمبيوتر يعملها بال 0 و 1. و كل ما عدد ال transistors أو ال bits يزيد نقدر نسجل data اكتر و بالتالي نقدر نعمل operations اكبر و اعقد وكل فترة بيتم تطوير ال processors عشان تكون ال computers بتاعتنا اقوي و اسرع و الدنيا كانت جميلة و زي الفل، لغاية ما حصل حاجتين، اولا بقي صعب نصغر الtransistors اكتر من كده (اصغر transistor اتعمل تقريبا 22nm يعني تقريبا حوالي 50 ذرة جنب بعض بس!) و تاني حاجة ان حجم ال problems الموجودة بقي اصعب بكتير (زي التنبؤ بالطقس مثلا) فمحتاجين حل تاني.

وهووب دبل  كيك يجي ال quantum computer، بدل الtransistors ال classical bits العلماء قرروا يتسخدموا quantum bits , واختصارا Qubits ودي ممكن تكون ذرة، فوتون او الكترون. كل حاجة من دول ليها خاصية مهمة جدا اسمها Magnetic Spin، و باختصار دي عاملة زي البوصلة كده، لو حطيت البوصلة في اي مجال مغناطيسي هتلاقي الابرة بتشاور علي الشمال، نفس الكلام بالنسبة لل qubits و الحالة دي هي ال 0 بالنسبة للquantum computer، تخيل بقي لو انت فتحت البوصلة و بايديك حركت الابرة عشان تكون في الاتجاه المعاكس، نفس الكلام ممكن يحصل مع ال qubits و بسموا الحالة دي high energy state لانك بتحتاج طاقة عشان تعمل كده، ودي بتبقي ال 1 بالنسبة لل qubits. تمام كده؟ 

نخش بقي علي التقبل، العلماء اكتشفوا ان  qubit مبيبقاش في حالة واحدة بس (0 أو 1) هوا ممكن يكون في الحالتين مع بعض بنسب مختلفة و ده اسمه quantum superposition و بالتالي في اي لحظة بيبقي فيه احتمالية ان ال qubit يكون 0 أو 1. و هنا تيحي قوة ال quantum computers. لو افترضنا ان عندنا 2 tranistors الي هيا classical bits عشان تعرف ايه متخزن فيهم، محتاج تعرف ايه الحالة بتاعتهم مثلا 11 أو 01 أو 10 أو 00، لكن لو عندك 2 Qubit أنت متعرفش هما 1 ولا 0 انت تعرف احتمالية انهم يكونوا في اي حالة من دول مثلا 20% 11، 20% 01، 50% 10، 10% 00.

يعني كده لو فيه 2 bits ليهم 4 احتمالات لكن لو 2 qubits ليهم 16 احتمال!يعني لو عندي عدد n من ال qubits هيشيل data قدbits  2ⁿ 

يعني لو فيه 300 qubit بس (مثلا 300 ذرة، يعني حاجة صغيرة جدا) بيساوا bit 2^{300 .}يعني اكتر من الذرات الي في الكون كله. نيجي بقي مين اسرع؟ في الحاجات البسيطة زي انك تتفرج علي فيديو او تفتح الانترنت ال classical computers هتكون اسرع! لأن ال quantum computers بتستغل فكرة ان فيه احتمالات كتير (states) عشان تعمل حاجة اسمها computational parallelism يعني تعمل اكتر من حاجة في نفس الوقت بتقلل عدد الخطوات الي محتاج اعملها عشان اوصل للناتج، بس في نفس الوقت الخطوة الواحدة بتكون ابطا عشان عملبة التحكم في ال qubits معقدة جدا. فالعمليات البسيطة مفيهاش خطوات كتيير اصلا، فالبتالي لما ال quantum computer يقلل عدد الخطوات مش هيعوض البطئ بتاع كل خطوة. بس قوة ال quantum computers بتبان في العمليات المعقدة زي التنبؤ بالطقس او ال decryption او العمليات الحسابية المعقدة جدا.

يعني من الاخر ال quantum computers مش هتبقي بديل لل classical computers. و هوا ده الجواب الفصيح! 

الجواب الفصيح في الكون الفسيح : 8

السؤال الثامن: ما هي اول دولة في التاريخ؟

السؤال ده بيلح عليا من زمان، و كانت دايما بتدايقني فكرة اني عشان اروح من دولة لدولة تانية لازم يبقي فيه روتين غريب و فيزا و بتاع، و بيبقي فيه احتمال كبير انك تترفض من غير سبب مقنع. عشان كده بتسائل، امتي فكرة الدول ديه حصلت؟ فكرة الدول ديه قديمة جدا، بس مفهومها بيتغير مع الزمن. في البداية خالص كانت الصراعات هيا الي بتقسم الناس، من اول ابناء سيدنا ادم لحد دلوقتي, بس مكنش لسه مفهوم الدولة بدأ. فكرة الصراعات بدأت تتطور و بقي كل جهة بتجمع اكبر عدد من الناس الي ممكن تصدق في فكرة الصراع علشان تبقي اقوي من الجهة التانية، وكل ما اعداد الناس بتزيد بتنشا خلافات اكتر، و هكذا. بعد فترة بدأت تنتشر فكرة الامبراطورية، و ديه تختلف عن مفهوم الدولة في اكتر من نقطة، منها ان الامبراطورية مش بتحترم اي كيان اخر او بتعترف بيه، و شايفة ان ليها الحق تسيطر علي العالم كله، و طبعا مكنش فيه دستور و لا كلام من ده.

بعد فترة محترمة من الزمن، بدأت الامبراطوريات دي تتبهدل بسبب النزاعات الداخلية و بدأ عصر الفسلفة و معاها بدأت تنشا اساس أفكار الحياة السياسية.  في خلال الوقت ده كان بيزيد اقتناع الناس انهم الشعب الافضل و انهم لازم يتمسكوا بهويتهم الي هيا اصلا من اختراع الحاكم او الامبراطور عشان يسيطر عليهم. بعد فترة بدأت فكرة الدول تظهر، طبعا كان شكلها مختلف عن المفهوم الحديث ليها، بس كانت عندها فكرة الشعب الواحد المختلف عن باقي الناس، الارض بتاعتهم، و بدأت تتغير الافكار الاستعمارية  شوية. اقدم تلات دول علي الاطلاق هما San marino و ديه دولة صغيرة كده جوه ايطاليا و بقي معترف بيها سنة 1631 تقريبا، و الصين و اليابان. طبعا مفيش دليل قاطع علي اقدمية اي واحدة فيهم، لان مفهوم الدول المستقلة بدا في القرن التاسع عشر. بعد كده نشات فكرة اسخف من مفهوم الدولة نفسه، الحدود! في البداية كانت الحدود الطبيعية زي الجبال و البحار هيا الي بتفصل بين الدول، بعد كده بدأت الدول الاستعمارية زي بريطانيا و فرنسا و البرتغال و اسبانيا و غيرهم، يقسموا في الدول زي صينية البسبوسة، و كل  واحد ياخدله حتة.

الملخص لما يجيلك واحد يقولك انا بلدي "مصر" ولا مش عارف ايه اقوله "اتلهي!". البني ادميين شبه بعض جدا، بنحب بعض لنفس الاسباب و بنكره لنفس الاسباب و بنتخانق لنفس الاسباب و هكذا. الاسود بيكره الابيض عشان هوا ابيض، و الابيض بيكره الاسود عشان هوا اسود. و هكذا في كل شئ!

من الاخر مفيش حد يعرف ايه اول دولة اتعملت، بس مفهوم الدول ده اصلا "بطاطس"! و هو ده الجواب الفصيح!

الجواب الفصيح في الكون الفسيح : 7

السؤال السابع: يعني ايه "كائن بوهيمي" ؟

طبعا علي عكس ما يتوقع الكثير، البوهيمية ملهاش علاقة بكونك "بهيم" دي حاجة تانية خالص. ال Bohemianism هيا بتطلق علي ال lifestyle بتاع الناس الي  بتخالف العادات العامة، زي احمد راتب كده لما كان بيقول "انا كائن بوهيمي يفعل ما يحلو له". الموضوع بدأ في القرن التاسع عشر، اصل الكلمة فرنسي bohemiens و معناها ال Gypsies او الغجر و المتشردين. وكانوا بيطلقوها علي الفنانين الي مش لاقين ياكلوا في شوارع باريس. الفنانين دول كان بيتمسكوا بال lifestyle ده عشان يبقي حاجة تمثلهم ضد الطبقة الارستقراطية الفرنسية، حاجة كده زي ما تروح تتجوز و تقول لابو العروسة "انا راجل عصامي"، بتستخدم الموضوع ده عشان تبرر مستواك الاجتماعي و يكانك فرحان يه. 

أول واحد كتب عن ال Bohemianism كان كاتب فرنسي اسمه Henry Murger. بعد فترة بدأت الناس الشحاتين و الحرامية ينضموا لل Bohemianism، بس للاسف ده خلي الناس تكره الفكرة و بعد كده أصبحت حاجة وحشة، رغم ان اصلها كان محترم جدا.

من الظريف ان فيه منطقة في التشيك اسمها Bohemia كان بيعيش فيها زمان جماعات من الغجر Gypsies، بس دي ملهاش علاقة بالموضوع ده مجرد تشابه اسماء. و فيه "بهيمية" تانية بس ده مرض نفسي اسمه Zoophilia أو Bestiality و ده بيخلي الشخص يميل لممارسة الجنس مع الحيوانات.

يعني من الاخر ال Bohemianism دي مش حاجة وحشة! وهو ده الجواب الفصيح!  

الجواب الفصيح في الكون الفسيح: 6

السؤال السادس: ليه قشر اللب بياخد حجم اكبر من اللب نفسه؟

السؤال ده كان بيطاردني من فترة كبيرة، و بعد تفكير و تدبير عميق وصلت لبعض الاسباب المحتملة. اولا ال structural shape بتاع اللب، اللب بيقبي شكله convex كده مقفل علي بعض، لما بتقشره بيبقي فيه احتمالية كبيرة انه ميرجعش لشكله الاصلي تاني و في الغالب بيعمل شكل concave زي كده.

ثانيا ال compress-ability الراجل بتاع المقلة و هوا بيبعلك اللب بتلاقيه بيضغط عليه في القرطاس عشان يحطلك لب اكتر، فبيقلل نسبة الهواء الموجودة في القرطاس. لكن و انت بتاكل اللب بترمي القشر بعشوائية و من غير ما تضغطه فيبقي فيه فراغات كتير فبالتالي بياخد حجم اكبر. ثالثا اللعاب بتاع حضرتك وانت بتاكل اللب بتخلي القشر يلزق في بعضه فيقدر يعمل tall structures من غير ما يقع، فبيزود الحجم.

عشان تتاكد من كلامي، حاول تحط القشر بتاع اللب في نفس القرطاس الي كان فيه في الاول هتلاقيه مش مكفي، و هتلاحظ ال 3 اسباب دول. وهو ده الجواب الفصيح!

الجواب الفصيح في الكون الفسيح : 5

السؤال الخامس: مين مبيحبش فاطمة؟

الحاج أنيس منصور كان بيسال السؤال ده من سنة 1993، و جه الوقت الي نجاوب فيه بقي، بص يا سيدي! مصر فيها 91 مليون راس، و نسة الاناث في 2015 كان 49%، يعني كده فيه 44.59 مليون انثي. نسبة الشباب من 18 ل 29 سنة هيا 23.7% يبقي كده فيه 10.56 مليون بنت في سن الجواز.

نيجي بقي للحتة الصعبة، هنفترض ان "الحب" هو الجواز، عشان احنا مجتمع محافظ و معنديناش غير كده! لو شوفنا بقي معدل العنوسة، هنلاقيه 17% يعني كده فيه حوالي 1.79 مليون بنت مش متجوزة أو مرتبطة، و من بين هؤلاء "فاطمة" المنشودة!

للاسف في مصر مفيش تعداد لاسماء البشر، عشان اصلا مفيش تعداد للبشر. المهم اقرب تقدير قدرت اوصله هو في امريكا! عدد الناس الي اسمهم فاطمة في امريكا تقريبا 1789 يعني تقريبا 1.2% من كل العرب الموجودين في امريكا. و لو افترضنا ان نفس النسبة دي في مصر (تقديرية جدا) يبقي عندك 

 كده فيه 28.74 الف فاطمة محدش بيحبهم. في الاول قلنا ان نسبة البنات في مصر 49% يعني تقريبا مساوية لنسبة الرجال، و لو عملنا 1:1 ratio يبقي كده فيه 28.74 الف واحد مبيحبوش فاطمة و بيحبوا حد تاني!

من الاخر كده المسلسل ده عمل مشكلة لأي واحدة اسمها فاطمة! و هو ده الجواب الفصيح!

الجواب الفصيح في الكون الفسيح :4

السؤال الرابع: هل ممكن حد يبقي عنده حساسية من الماء؟

في سنة 1963 اتنين dermatologists -طبيب/خبير جلدية- في بنسلفانيا جالهم مريضة عندها 16 سنة، كل ما تنزل حمام السباحة او تاخد شاور، جلدها يحمر و يبقي itchy لدرجة مؤلمة جدا. الدكاترة حاولوا يشوفوا ايه السبب، جربوا يحللوا الماء، او يستخدموا ماء ساخن او بارد، او حتي ماء مقطر. و النتيجة نفسها. ديه تقريبا اول حالة لمرض نادر اسمه Aquagenic Urticaria، او حساسية الماء. لمرض ده نادر مفيش منه حالات كتير مثبتة. الغريب ان ده مش زي اي حساسية، ده skin disorder، يعني مش بيحصل حاجة للمريض غير لما الجلد يتعرض للماء، و مبيتاثرش من الاكل او الشرب مثلا، و الغريب برضه انه في الغالب بيجي للبنات بس، و ممكن يوصل لمرحلة ان العرق نفسه ممكن يسبب التهابات.

 حتي الان المرض ده ملوش علاج. فتخيل حياة واحدة مش عارف تستحمي او تغسل وشها، و لو عملت كده الموضوع بيقي مؤلم جدا. 

يعني الاجابة المؤلمة، نعم! وده -للاسف-الجواب الفصيح!

الجواب الفصيح في الكون الفسيح : 3

السؤال الثالث: لو عربية اسعاف -رايحة تنقذ واحد- خبطت واحد في الشارع، تنقذ مين الاول؟

سؤال عميق مش كده. في مصر طبعا المسعفين هيسيبوا الاتنين و يروحوا يشربوا حجرين و يروقوا، الخبطة اكبد بوظت نفسيتهم. في اي حتة تانية ساعتها الموضوع يبقي محير! لو بصيت من ناحية ال moral responsibility هتلاقي ان المفروض انهم ينقذوا الراجل الي خبطوه الاول، عشان هما المسؤلين عن معاناته، بينما الراجل التاني الي رايحين ينقذوه مش هما الي تعبوه، زي مثلا لو واحد صاحبك اتطرد من الشغل هتبقي حاسس انك مفروض تساعده من باب الانسانية، بس لو انت السبب انه يتطرد هتبقي حاسس انها مسؤليتك انك تساعده.  لو بصينا من ناحية materialistic شوية يبقي الافضل يروحوا ينقذوا الراجل الاولاني، عشان اصلا هما كانوا مستعجلين و خبطوا الراجل في الشارع عشان ينقذوه، ميضيعوش بقي كل ده علي الفاضي. انا رايي ان المفروض ينقذوا الراجل الاولاني، عشان هوا الي طلب الاسعاف مش حد تاني، و بما انه (بطريقة ما) بيدفع تمن الخدمة ديه فمن حقه تروحله هو مش لحد تاني. بغض النظر عربية ااسعاف خبطته ولا لأ. 

يعني من الاخر الافضل تروح تنقذ الراجل الاولاني و تحاول تبعت حد تاني للراجل الي خبطته. او اقولك خدهم هما الاتنين في العربية! بسيطة! و هو ده الجواب الفصيح!